Македонската репрезентација во хокеј на мраз во голем стил стигна до златниот медал на „Девелопмент куп“ што изминатите денови се одржуваше во Германија, а на кој учествуваа земји кои немаат изградено затворени арени за хокеј.

„Црвено-жолтите“ вечерва за ривал во финалето ја имаа Португалија, декласирајќи ја оваа селекција со 9-3 за искачување на највисокото место на победничкиот пиедестал. Убедливата победа беше најавена уште во првиот период со водство од 3-0, предноста на македонските хокеари во втората третина порасна на 7-1, за со рутинска игра да се задржи позитивата до конечните 9-3.

Со пет победи на петте одиграни натпревари, македонските хокеари покажаа најмногу на ова натпреварување и сосема заслужено стигнаа до првото место.